A feira internacional Fitur comezou este mércores para dar a coñecer as novidades da oferta turística galega para este 2024. Un ano máis, Mar de Santiago está en Madrid co obxectivo de continuar a promoción do xeodestino e presentar detalladamente o seu Plan de Sustentabilidade Turística.
Esta mañá, no stand de Galicia, levouse a cabo a presentación do territorio, onde se expuxeron as liñas mestras do Plan de Sustentabilidade Turística para o ano 2024. O obxectivo principal é seguir atraendo visitantes a este roteiro marítimo- fluvial da Traslatio, promovendo o territorio mediante a diversificación da oferta. No acto, participaron Antonio Casas, xerente da Axencia de Turismo de Galicia; Santiago Paz, responsable da asistencia técnica do xeodestino e Gonzalo Durán, alcalde de Vilanova de Arousa.
Este ano, a presentación destaca a auga como un distintivo fundamental de Mar de Santiago, sendo o único roteiro marítimo do Camiño de Santiago. O obxectivo principal deste proxecto é fomentar o crecemento dos destinos de maneira sostible, respectando e recuperando a contorna, aproveitando a contribución do turismo, un recurso que debemos considerar como unha riqueza capaz de axudar na recuperación do entorno dos catro municipios. Na presentación sublíñase tamén a desestacionalización do turismo, argumentando que Mar de Santiago ofrece actividades e recursos turísticos durante os doce meses do ano, tamén para o turismo de proximidade.
A auga, como elemento central en Mar de Santiago, adquire unha importancia significativa, e durante a presentación do territorio abordáronse exemplos concretos de recuperación da contorna e do impacto da auga no territorio. En Valga, a antiga mina de Porto Piñeiro foi transformada na Lagoa de Mina Mercedes, un novo recurso recreativo e turístico. En Catoira, descubriuse un manancial de augas mineromedicinais con caudal suficiente para construír un balneario. De maneira similar, en Vilanova de Arousa tratan a auga do mar como elemento central para a saúde, mentres que en Pontecesures emprégase en procesos industriais, como na fabricación de cerámicas.
O Plan de Sustentabilidade Turística presentado por Mar de Santiago en FITUR 2024 fundaméntase en catro eixos: transición verde, eficiencia enerxética, transición dixital e competitividade. Este territorio, que busca converter o seu mar nun auténtico luxo, ofrece a experiencia única de revivir o percorrido realizado polos restos do Apóstolo Santiago, ao mesmo tempo que descobre as paisaxes e o patrimonio dos municipios de Catoira, Vilanova, Valga e Pontecesures.