Romaría Viquinga

  • Romería Vikinga
  • Romería Vikinga
Dirección

36612 Catoira, Pontevedra

Coordenadas GPS

Lonxitude: 42.67613426088118

Latitude: -8.724712504198129

Trátase, sen dúbida, dunha das máis singulares festas que se celebran en Galicia, e na que se rememora a resistencia local ás frecuentes invasións viquingas.

O que comezou en 1960 como unha iniciativa dun grupo de amigos vencellados ao Ateneo do Ullán, un foro artístico e literario formado por intelectuais da zona, foi crecendo e evolucionando ata converterse nun multitudinario evento recoñecido como Festa de Interese Turístico Internacional.

Na actualidade, e organizado polo concello de Catoira, transcendeu por completo á festa orixinal, o seu elemento máis significativo, para xerar todo un fenómeno cultural e turístico. Así, vencellados a este tema, producíronse constantes intercambios culturais con comunidades e universidades nórdicas, esencialmente danesas e norueguesas, que xeraron viaxes en ambas direccións, encontros culturais, ou a recreación de tres naves viquingas, varadas en Catoira, e que se empregan durante o asalto ás torres.

O programa de festexos inclúe unha Semana de Teatro, unha cea viquinga, mercado tradicional, festival de música Vikinsons etc., que completan os actos da Romaría Viquinga.

Igualmente, desde 2014, o Concello de Catoira forma parte –e é a única localidade española– da Destination Viking Association que xestiona o Gran Itinerario Cultural dos Viquingos, promovido polo Consello de Europa. Se temos en conta que o primeiro itinerario europeo acreditado foi o Camiño de Santiago, en 1987, poderémonos facer unha idea da transcendencia deste recoñecemento.

OFICINA TURÍSTICA DE

Catoira

Paseo Xelmírez 2, Catoira (Pontevedra)