Museo da Historia de Valga

Tanto se queremos saber máis e complementar a nosa visita a Valga, coma se temos pouco tempo e buscamos unha rápida visión sobre este concello, o Museo da Historia é unha cita obrigada.

Neste moderno edificio atopamos unha coidada selección dos principais sinais de identidade do concello de Valga. Consta de catro plantas que nos achegan ao territorio e ao medio natural, á historia, á vida e obra de Ferro Couselo e, finalmente, a unha personaxe tan apaixonante como a Bella Otero. Precisamente, un anexo a este edificio recrea unha vivenda tradicional da Galicia de hai un século, con múltiples referencias a esta singular muller.