Lagoa Mina Mercedes

Durante anos foi unha explotación de arxila dunha empresa local de Valga da que quedou un enorme oco que, de forma natural, foise enchendo de auga ata formar a maior lagoa de orixe non natural da provincia de Pontevedra, con algo máis de 3 ha, e uns 20 m de profundidade. Desde aquí partía unha singular liña aérea de vagonetas que, suspendidas dun cable, transportaban os produtos ata un embarcadoiro no río Ulla.

Actualmente, este gran brañal é parada habitual de diversas clases de aves migratorias, como patos e cisnes, ademais de anfibios e peixes.

O agradable sendeiro que rodea a lagoa, o equipamento de pasarelas, bancos, mesas e pantaláns para practicar a pesca sen morte, fan deste lugar unha alternativa de ocio.