Saltar ao contido

Mar de Santiago

Portada » Instagrammers galegos deron a coñecer a excursión Mar de Santiago entre os seus máis de 100.000 seguidores

Instagrammers galegos deron a coñecer a excursión Mar de Santiago entre os seus máis de 100.000 seguidores

SalidaAutobusExcursionMarDeSantiago

Instagrammers galegos coñeceron de primeira man a excursión Mar de Santiago nunha completa xornada entre os municipios que compoñen o xeodestino (Vilanova de Arousa, Catoira, Valga e Pontecesures). A través dos seus perfís en Instagram deron a coñecer esta experiencia a unha comunidade virtual composta por máis de 100.000 persoas.

Zoe García (@conzdezoe), Estefanía Pena (@engaliciamorate) e Alberto Ribas (@alvientooo) transmitiron as vivencias de seguir os pasos do Apóstolo a través do territorio que deu orixe ao fenómeno das peregrinacións. O percorrido comezou esta mañá en Compostela, onde regresaron tras o periplo polos principais lugares de interese de Mar de Santiago.

A primeira parada foi Valga, onde se puideron achegar á cultura do municipio a través do Museo da Historia, coa figura de La Bella Otero como principal expoñente. Dende alí, continuaron o percorrido en Vilanova de Arousa (Bodegas Granbazán), onde desfrutaron dunha visita guiada ás instalacións e dunha cata comentada de viños da D.O. Rías Baixas harmonizados con conservas e queixos galegos.

Seguindo os pasos do Apóstolo

Trala pausa para xantar, o itinerario continuou por Pontecesures. Alí, puideron descubrir outro dos produtos gastronómicos por excelencia do territorio (a lamprea), ademais de coñecer máis detalles sobre a ponte romana desta localidade. Complementouse a información coa explicación sobre o Fito Xacobeo, o cruceiro que marca o inicio e final do único Vía Crucis marítimo-fluvial do mundo, coñecido tamén como a Traslatio. O paseo en barco entre Pontecesures e Vilanova de Arousa emula o itinerario realizado polos restos do Apóstolo no seu percorrido cara a Compostela, e que deu orixe ao fenómeno das peregrinacións.

O percorrido a bordo ofrece as impresionantes paisaxes a pé do río Ulla de Valga, facendo unha breve parada fronte a Vilarello, a única praia fluvial de Mar de Santiago. A continuación, o barco adéntrase no territorio de Catoira, onde se explica a orixe das Torres de Oeste, a antiga fortaleza de Compostela, así como a singularidade do cruceiro da Illa de Castrivello. Todo isto na fermosa contorna natural do esteiro do río Ulla.

Xa na entrada da Ría de Arousa, o itinerario discorre entre illas e bateas. Aprovéitase, así, a ocasión para dar a coñecer o cultivo tradicional doutro dos produtos gastronómicos estrela de Mar de Santiago, o mexillón.

Tras desembarcar na Estación Marítima de Mar de Santiago (Vilanova de Arousa), a excursión pon o broche de ouro ofrecendo as impresionantes panorámicas do Ulla e da ría dende o miradoiro de Pedras Miúdas, en Catoira. Un final co que se pode realizar un repaso ao percorrido da Traslatio a vista de paxaro para despois emprender o regreso a Compostela.

En xeral, os instagrammers participantes sorprendéronse coa beleza e riqueza histórica, cultural e enogastronómica do territorio. Unha experiencia diferenciadora que así transmitiron ás súas amplas comunidades de seguidores.

Todos os xoves

A excursión Mar de Santiago continuará todos os xoves deste mes e o primeiro de setembro. Deste xeito, preténdese descubrir o xeodestino a peregrinos e visitantes cunha completa xornada que ten a Traslatio como fío condutor.

Toda a información sobre esta proposta turística pódese atopar na sección de axenda desta web. A reserva da excursión Mar de Santiago, operada por Tour Galicia, pódese realizar en https://tourgalicia.es/producto/traslatio/.

A maiores, ofrécese a posibilidade de visitar o territorio por conta propia reservando unicamente a ruta da Traslatio. Para iso, pódese contactar con calquera das catro navieiras que operan no territorio: Amare Turismo Náutico, La Barca del Peregrino, Tours Rías Baixas ou Viajes Juan Allo. Os horarios actualizados das saídas de barcos pódense consultar na nosa web e tamén nos nosos perfís de Facebook e Instagram.

Deixa unha resposta

O teu enderezo electrónico non se publicará Os campos obrigatorios están marcados con *