A bordo
Estación marítima Mar de Santiago
1.
Porto Mar de Santiago en Vilanova
A estación marítima de Vilanova de Arousa é o punto de partida do noso percorrido a bordo do Mar de Santiago. Desde aquí parten a maioría dos barcos que percorren a ruta remontando a ría de Arousa e o río Ulla como fixera o corpo do Apóstolo Santiago durante a Translatio. Nada máis partir é posible contemplar, ademais, unha fantástica panorámica da ría e dos parques de bateas do municipio, entre os máis importantes de Galicia.
Torres de Oeste
2.
Torres de Catoira
As emblemáticas Torres do Oeste, situadas ás beiras do Ulla no municipio de Catoira, son unhas das vistas máis impresionantes que se poden desfrutar navegando a ruta Mar de Santiago. Ao lado de restos da fortaleza medieval, levantada para a protección dos tesouros de Compostela, tamén é posible contemplar a recreación do drakar que se usa durante a Romaría Viquinga.
Os 17 cruceiros da ruta
3.
Os 17 cruceiros ao longo do río Ulla
Máis alá da beleza natural do espazo, ao longo da ruta Mar de Santiago veremos tamén o único Vía crucis marítimo do mundo. Trátase de 17 cruceiros de pedra que sinalan o percorrido realizado polo Apóstolo durante a Translatio, cada un coas súas propias peculiaridades e símbolos, que foron doados ao longo dos anos polos municipios nos que se levantan, a igrexa, varias empresas e diferentes institucións.
Porto fluvial de Pontecesures
4.
Porto fluvial de Pontecesures
A ruta remata no porto fluvial de Pontecesures, contorna natural dos baleiros. Trátase de pescadores dedicados á captura da lamprea mediante artes tradicionais aos que é sinxelo ver faenando, durante a tempada, nas proximidades dos pantaláns. A poucos metros do lugar de atraque atópase a ponte romana que une a localidade coa provincia da Coruña, e que enlaza coa ruta portuguesa a pé do Camiño de Santiago.
